وه‌زیرێ خواندنا بلند و ڤه‌كۆلینێن زانستى هه‌لوێستێ ماموستا و فه‌رمانبه‌رێن زانكۆیێن كوردستانێ بلند دنرخینیت كو ل گه‌ل به‌لاڤه‌بوونا په‌تایا كۆرۆنا و كاریگه‌ریێن بوارێ دارایى، نه‌هێلان پرۆسا خواندنێ بهێته‌ لابرن و بزاڤا سه‌ركه‌فتنێ كرن هه‌تا كو ئه‌نجامدایى.

ل رۆژا دووشه‌مبێ رێكه‌ڤتى (09/11/2020) دكتۆر (ئارام محمد قادر) وه‌زیرێ خواندنا بلند و ڤه‌كۆلینێن زانستى و شاندێ لگه‌لدا سه‌ره‌دانا زانكۆیا زاخۆ كرن ژبۆ نێزیك هایداربوون ب ره‌وشا زانكۆیا زاخۆ كو د چارچۆڤێ پلانێن وه‌زاره‌تێدا ژبۆ سه‌ره‌دانیكرن بۆ هه‌مى زانكۆیێن كوردستانێ د ئه‌ڤێ سه‌ره‌دانێدا لگه‌ل سه‌رۆكێ زانكۆیا زاخۆ ب ئاماده‌بوونا رێڤه‌به‌رێن گشتى یێن وه‌زاره‌تێ كۆمبوو.

لده‌ستپێكا كۆمبوونێ، وه‌زیرێ خواندنا بلند و ڤه‌كۆلینێن زانستى سوپاسیا ئه‌نجومه‌نێ زانكۆیێ و ماموستا و فه‌رمانبه‌ر و قوتابیان كر ژبۆ دلخۆشى و لسه‌رخۆگرتنێ بۆ پرۆسا خواندنا ئه‌ڤساله‌، ژبه‌ر ئه‌ڤێ چه‌ندێ ژی رۆلێ ماموستا و فه‌رمانبه‌رێن زانكۆیێن كوردستانێ بلند نرخاند ژبه‌ر هه‌بوونا په‌تایا كۆرۆنا و كاریگه‌ریێن بوارێ دارایى و ئایوورى ، كو نه‌هێلان پرۆسا خواندنێ بهێته‌ فه‌وتاندن و ملێ خۆ دایه‌ سه‌ركه‌فتنا ئه‌ڤێ پرۆسێ، هه‌روه‌سا دكتۆرى داخواز ژى كر كو ئه‌ڤساله‌ بهێزتر و چالاكتر بهێنه‌ به‌یدانا خزمه‌تكرنێ ژبۆ نه‌وه‌یێن پاشه‌رۆژێ

سه‌باره‌ت ب پرۆسا خواندنێ ب سیسته‌مێ ئاوێته‌ دكتۆر ئارام محمد قادر پتر رۆنكر كو ئه‌ڤ پرۆسا خواندنێ ئێكه‌ ژ ئه‌وان هه‌لبژاتنێن ب ناچارییه‌ ژبۆ وێ یه‌كى كو پرۆسا خواندنێ یا پاراستى بیت، هه‌روه‌سا ئه‌وله‌ویه‌تا وه‌زاره‌تێ ژى ژبۆ خواندنا ناڤ كه‌مپسێیه‌ ، دكتۆرى ئه‌و چه‌نده‌ ژی دیاركر كو ئۆمێدا وان ئه‌وه‌ كو باردۆخ باشتر بیت هه‌می وانان لناڤا كه‌مپسێ بخوینن و ژیانێ وه‌كى جاران ڤه‌گه‌ریننه‌ ڤه‌، بشێوه‌یه‌كى كو گیانێ ماموستا و فه‌رمانبه‌ر و قوتابییان لبه‌رچاڤ بهێته‌ وه‌رگرتن.

هه‌ر د هه‌مان سه‌ره‌داندا بۆ كه‌مپا زانكۆیا زاخۆ دكتۆر ئارام محمد قادر سه‌ره‌دانا تۆمارا گشتى كر و لنێزیك قوتابیێن وه‌رگرتى یێن ئه‌ڤساله‌ دیتن و داخواز كر كو ب جێبجێكرنا رێنمایێن ساخله‌میێ ئه‌ڤسالا خواندنێ ب سه‌ركه‌فتیانه‌ ده‌ستپێبكه‌ن و هه‌روه‌سا گۆهداریا پێشنیاز و كێشه‌یێن وانا كر.

ل دوماهیێ ب مه‌ره‌ما لنێزیك ئاگه‌هداربوون ب چاوانیا برێڤه‌چۆنا پرۆسا خواندنا ئه‌ڤسال ب سیسته‌مێ ئاوێته‌، وه‌زیرێ خواندنا بلند سه‌ره‌دانا كۆلیژا زانستێن مرۆڤایه‌تى و كۆلیزا زانست و تاقیگه‌هـ و یه‌كه‌ و هۆلێن خواندنا ماسته‌ر و دكتۆرایێ كر، د كۆمبوونا وه‌زیریدا چه‌ندین گه‌نگه‌شه‌ ل گه‌ل ملموستا و سه‌رۆك به‌ش و قوتابییاندا كر لسه‌ر چاوانیا برێڤه‌چۆنا پرۆسا خواندنێ لناڤا كه‌مپسێ ب پاپه‌ندبوونا رێنمایێن ساخله‌میێ و سپاسیا هه‌مى ستاف و ماموستا و فه‌رمانبه‌ر و قوتابیێن زانكۆیا زاخۆ كر ژبۆ پێشوازیا جوان.